Sa Panaginip ko...

Sa panaginip ko, akin ka.

Minsan ayoko ng magising. Minsan, gusto kong itigil 'yung pagpalit ng panaginip ko, manatili ka lang akin. Sa panaginip ko lang kasi totoo lahat. Sa panaginip ko, may makikitang saya sa mata mo, may makikitang pagmamahal. Sa panaginip ko.

Kung pwede lang manatili sa panaginip ko. Dun na lang tayo. Isasayaw kita sa gitna ng hardin, kakalimutan natin ang mundo. Kakalimutan nating panaginip lang. Kakalimutan nating pagmulat ng magaganda mong mata, baka ni hindi mo pa nga maalala. Pero sa panaginip ko, akin ka.

Kung pwede lang wag bitawan ang kamay mo. Sa panaginip ko. Sa panaginip ko kasi akin 'to. Sa panaginip ko, perpekto. Haharanahin kita sa paraang alam ko, sa tonong tanging ang me alam ay ikaw at ako. Sa panaginip ko.

Kung pwede lang, hindi ako bibitaw sa mga yakap mo. Ikukulong kita sa mga bisig ko. Sa panaginip ko, pwede 'to. Sa panaginip ko, hindi ka tumatakbo. Hindi ka lumalayo.

Kung pwede lang, isasama kita sa panaginip ko. Baka sakaling magustuhan mo din lahat ng nandon. Isa isa ko ng binuo lahat ng pangarap mo. Ikaw na lang ang kulang, sa panaginip ko. Naghihintay na satin ang mga bulaklak, ang halimuyak. Iniintay na maglaro tayo sa gitna ng hardin. Maghabulan. Iniintay nila ang tinig mo. Kasi sa panaginip ko, buo na ang lahat. Ikaw na lang ang kulang. Tayo na lang.

Sa panaginip ko, akin ka.

Kaya patuloy akong pipikit, mananaginip. Hawak kong kamay mo. Yakap kita. Nakatingin ka sakin. Nakangiti ka. Habang ang mga bulaklak ay sumasayaw sa saya. Ramdam din nila yung sayang ramdam ko, yung sayang sa panaginip ko, ramdam mo.

Kaya patuloy kong bubuuin lahat ng pangarap mo. Sa panaginip ko. Unti-unti kong gagawin lahat ng hiling mo, lahat ng ibig mo. Para kung sakaling sumama ka saking lumipad patungo sa panaginip ko, lahat perpekto.

Minsan, pinilit kong gisingin ang sarili ko sa panaginip. Masakit na sa mata ang bawat gabing pagpilit. Alam kong akin ka, sa panaginip. 

Sa panaginip ko, hindi ka malayo. Sa panaginip ko, andun ka. Naghihintay sakin ng masaya. Kung sana pwedeng gumising isang araw na kasing tamis ng panaginip ko yung realidad. Sana sa paggising ko isang umaga, hindi ko na kelangan pa managinip para makasama ka. Sana, hindi lang sa panaginip, akin ka.

Pero kung ito lang talaga yung tanging paraan para maging akin ka. Muli't muling ipipikit ang mata. Lilipad patungo sa mundo kung nasan ka. Mananaginip para makasama ka. Maramdaman lang ang init ng palad mo sa palad ko. Madampian lang ng pag-ibig ang mga labi mo. Doon sa hardin kung saan tayo tumatakbo. Tara na! Lumipad na tayo. Kalimutan ang mundo. Kalimutang sa panaginip lang ito magkakatotoo.

Sa panaginip ko, akin ka. Kaya muli kong ipipkit ang mga mata. Iisipin ka. Magkita tayong muli sa mundo kung san akin ka. Hihintayin kita...

(These Dreams by Heart)