Paulit ulit na Nobela

(Nobela by Join the Club)

kalimutan mo na ko...

kalimutan mo na ko...

kalimutan mo na ko...

peste. sana tang ina mo na lang 'yung narinig ko galing sa'yo. mas okey pa sigurong 'yun 'yung nagpapaulit ulit ngayon sa utak ko. 

habang naglalakad. palayo. habang paulit-ulit 'yung sinabi mo. habang sinasabayan pa ng kantang 'to. habang umaambon. habang hindi ko alam kung anong ganap ng gloomy na panahon. ayos. parang nag-usap usap kayong lahat para ibaon ako sa lungkot ngayon. well, kung ganun nga, happy? mga dre, baon na baon!

hindi ko na nga alam kung san ako papunta. hindi ko na pansin 'yung mga kasama ko. wala na kong marinig. wala na kong makita... hanggang me truck na bumusina. wag ka masyadong magsaya. sa sobrang lakas non, hindi ako bingi para hindi marinig at umiwas kaya eto pa din ako, alive. pero sana naka-headset ako ng mga oras na 'yon. mas gusto ko 'yung biglaang sakit. parang knockout game sa basketball. isang hirap lang, isang iyakan. hindi katulad nitong pinaparamdam mo sakin ngayon, unti unti. masakit 'to kasi pinaabot mo pang game 7. kung kelan binigay ko na lahat ng kaya kong ibigay. kung kelan mahirap ng bumitaw, kung kelan pakiramdam ko abot ko na 'yung kampeonato. saka ka naglaro. saka mo pinatunayang, anumang mangyari, ikaw pa rin ang ace player ng laro.

shoot! me foul pa nga e. kaso imbes na ikaw 'yung nasaktan, ako. akala ko kasi kaya ko ng palpalin 'yung opensa mo. akala ko. hindi pa din pala. sabagay.

kakalimutan na kita.

kakalimutan na kita...

kakalimutan na kita?

ayos ah. para ka lang nagsend ng friend request sa FB. anong akala mo, ganun kadali 'to i-confirm? tipong isang click, tapos? dude, you're forgetting something. katabi lang ng Confirm tab 'yung not now. Atleast, hindi never 'yung nakalagay don. me karampot na pag-asang magkaron ng confirmation 'tong request mo. soon. 'pag nag-open ulit ako.

lakad lang ng lakad. habang paulit ulit 'to sa isip ko. pano? oo nga. pano? baka naman may "how to forget you" tips ka diyan? balato mo na sakin. tutal, request mo naman 'to. para ka lang nagpost ng link sa timeline ko. malay natin, effective?

madali naman akshuli mag-unfriend, pwede ding mag-block user. kaso, hindi katulad sa Facebook, hindi isang click lang 'yung pagmu-move on. at hindi ka boss para within a snap, sundin ko 'yung sinabi mo. mahirap kaya 'to. mahirap lalo kapag paulit ulit nagpa-flashback sa utak ko lahat ng sinabi mong pangako. habang tuwing titingnan ko 'yung kalendaryo, sa isang petsa lang ako napapahinto. akala ko ilang ganun 'yung bibilangin natin non. akala ko.

mahirap lalo habang paulit ulit 'tong kantang 'to, habang bawat linya nito binabalik ako papunta sa mga alaala mo. mahirap kasi akala ko lumalakad ako palayo pero hindi ko napapansin, unti unti na pala kong lumiliko. saan pa? pabalik. pabalik kung san mo sinabing kalimutan na kita.

kalimutan mo na ko...

kalimutan mo na ko...

kalimutan mo na ko...

wag kang excited. magagawa ko din 'to. siguro, sa susunod na araw. sa susunod na linggo. pero pwede, wag ngayon? gusto ko pang alalahanin lahat. gusto ko pang paasahin 'yung sarili kong hindi pa tapos. joke lang lahat ng sinabi mo, na pagkatapos nating maglakad, may sorpresa ka sa dulo. ngayon na lang naman e. huli na 'to. 

malapit na kong mapuno sa paulit ulit na "kalimutan mo na ko". narinig ko naman e. malinaw. malinaw na malinaw. bakit kelangang paulit ulitin? bakit kelangan naka-repeat mode? hindi pwedeng isang beses lang? isang sakit lang? isang iyak lang? sana isang bagsakan na lang. knockout kung knockout.

hanggang sa nasa dulo na tayo. wala 'yung sorpresang pilit inasahan ko. na sayo ang kampeonato. nanatili ka sa pagiging MVP mo. umalis ka. walang salita. naiwan ako habang paulit ulit pa din sa utak ko 'yung "kalimutan mo na ko", habang sinasabayan ng gloomy na panahon, habang papalakas pa 'yung ambon, habang paulit ulit ulit 'yung kantang 'to sa isip ko na parang nag-usap usap kayo na ibaon ako sa lungkot ngayon. well, y'all should be happy. hindi niyo lang ako binaon, sinigurado niyo pang wasak ako at mahihirapang umahon.

[[ Music Fading ]]

...at aalis, magbabalik, at uuliting sabihin na mahalin ka't sambitin kahit muling masaktan...

[[ Lights Off ]]