Sa Mata ng Economics

Sa totoo lang, madami pa kong dapat isipin. Madami pa kong mas dapat unahin. Kaso sabi sa economics, mas inuuna daw dapat ung mga bagay na may mas mataas na utility. ‘yung mga bagay na mas makakapagbigay sa’yo ng happiness at satisfaction. At bali-baliktarin ko man ang mundo, alam kong ikaw pa din ang nasa front line kung utility ko ang pag-uusapan.

Kaya eto ko. Kahit acknowledgement pa lang ng thesis ko ‘yung natatapos ko. Kahit nagagalit na si nanay sa dami ng back subjects ko at inuulan na ng tres at singko ‘yung mga class cards ko. Eto ko. Iniintay ka umuwi, gabi na e. Baka mapagtripan ka nung mga gago sa daan. Eto ko kasi kahit itanong mo pa sa economics, tamang ikaw ang unahin ko.

Hindi ko din alam. Sabi mo, patunayan ko munang sarili ko. Sabi mo, hindi tamang ikaw ‘yung pinagbubuhusan ko ng oras ko. E niloloko lang pala ko ng economics e. Ginagago ko nung makapal na libro. Ba’t ako naniniwala? Hindi ko alam.

Siguro… gusto ko lang bigyang eksplinasyon ‘yung kabaliwan ko. Siguro… gusto ko lang bigyang paliwanag ‘yung kahibangan ko. Paliwanag na hindi kayang banggain ng mundo. Paliwanag na pwedeng paniwalaan ng lahat ng makasalubong ko. Tulad na economics. Tulad ng utility.

Pero kahit naman walang ganitong eksplinasyon, kahit walang siyentipiko o ekonomistang depinisyon, wala naman akong pake kahit di nila maintindihan, kahit hindi sila maniwala. Walang kaso kahit hindi nila intindihin. Ang mahalaga lang naman sa pag-ibig… ‘yung dalawang taong nagmamahalan. ‘yung iba, may iba silang mundo. Mundong sila lang din ‘yung gustong umintindi, sila lang din ‘yung magkakaintindihan.

Kaya eto ako. Gumagawa ng mundo para sa’yo kung san ‘yung utility, katulad sa economics, ‘yung dapat inuuna. Kung san kung saan ka mas magiging mas masaya, dun iikot. Kasi kahit gawin ko pang kwadrado ‘yung mundong ginagawa ko, lahat ng kanto non, nakapangalan sa’yo.

Kaya kahit madami pa kong dapat i-analyze na survey, madami pang chapters’yung thesis kong nasa bingit pa din ng alanganin at kahit naiinip na ‘yung diploma ko sa tagal ng overdue niya, eto ko. Kahit madami pa kong dapat isipin, madami pa kong dapat unahin, eto ko. Kasi sabi sa economics, mas dapat daw bigyang priority ‘yung mga bagay na may mas mataas na utility. ‘yung mga bagay na makakapagbigay sa’yo ng happiness at satisfaction. Kaya eto ko…